Tambak na nga sa basura, tatambakan pa ng ingay na puno rin ng basura.

Talamak sa panahon natin ngayon ang pagkalat ng mga maling impormasyon na siyang mariing nilalabanan ng mga mamamahayag. Gayunpaman, may ilan pa ring nagpapakalat ng kasinungalingan dahil lamang mayroon silang plataporma at impluwensya.

Isang halimbawa nito ang naging Facebook post ni Boss Toyo, isang influencer, na sumasalungat sa mga naipakita sa dokumentaryo ni Kara David, isang batikang mamamahayag, tungkol sa tinambak na basura sa bundok ng mga Aeta sa Subic, Zambales.

Ayon daw sa kaniyang nakita, wala namang masangsang na amoy doon, maging ang mga langaw. Mistulang amoy ang basehan upang makita ang tambak-tambak na kadugyotang ginawa sa bundok.

Sinabi rin niyang pribado raw ang lupang iyon at wala nang nakatirang katutubo sa bundok. Ngunit alinsunod sa inilabas na Certificate of Ancestral Domain Title ng National Commission on Indigenous People, ang lupang tinambakan ng basura ay kasapi at sakop ng ancestral domain ng mga Aeta Ambala Indigenous Cultural Community.

Kung titingnan, mahigit isang buwan ang inilaan nina Kara David sa pagsasaliksik tungkol sa lugar bago nila ilabas ang dokumentaryo. Samantala, tila bumisita lamang naman si Boss Toyo roon at nagpahayag na ng kaniyang obserbasyon na taliwas sa karanasan ng nakipamuhay roon. Higit pa rito, naglahad pa siya ng mga impormasyong wala namang katunayan.

Lahat naman nito ay isa-isang pinabulaanan ng I-Witness, kung saan kabilang si Kara David, sa kanilang inilabas na pahayag. Pinapakita lamang nito ang malinaw na pagkakaiba ng mga influencers, na walang pag-aatubiling mag-post dahil marami ang followers, sa mga mamamahayag na gumugugol ng ilang buwang pagsasaliksik para marami ang mamulat.

Hindi naman masamang magsalita tungkol sa mga isyung kinakaharap ng ating bansa at ng ating kapwa mamamayan. Ngunit kung ang simpatya natin ay may halong panlilinlang at kasinungalingan, tatabunan lamang nito ang ating pinaglalaban sa simula. Kaya sa halip na makatulong ang post ni Boss Toyo, pinapasimple lamang nito ang usapin na siyang kawalan ng respeto sa mga katutubo pati na rin sa mga dokumentarista.

Sa panahong nanganganib pa rin ang katotohanan, suriin muna natin ang bawat pahayag ng mga mayroong plataporma. Sapagkat kailan man hindi nasusukat ang katotohanan sa lakas ng impluwensiya, kundi sa bawat ebidensya at tapat na impormasyong kayang tumindig sa kabila ng anumang uri ng kasinungalingan.

Katiwalian ang kalaban dito, hindi ang katotohanang inilantad ng isang dokumentaryo. Kaya bago tayo makisawsaw, tiyakin muna nating nasa angkop tayong sawsawan.

The Frontman