Sa panahon ngayon, ang mga influencers na ang nagiging comfort zone ng mga tao. Ngayon, hindi na lang content ang binebenta nila—kundi ang impluwensiya. Isang click ng post, libo na ang maabot. Isang video lang, puwedeng milyon na ang makapanood. At ang isang giveaway? Kaya mapahinto halos lahat, para manalo.

Sino ba namang tao ang hindi mapapasali sa raffle na ’kala mo ay like, share, at comment lang ang gagawin? Sa unang tingin, iyon lang talaga ang aakalain ng mga tao, pero pagbukas ng comment section, may bubungad sa iyo na link—page ng Casino Plus, nakakataka lamang, kung kay Ivana Alawi talaga galing ang pera pambili ng iPhone 17, bakit may nakaangkor na page?

Mukha naman talaga itong simpleng raffle, gagawin mo lang ang mga requirements, pasok ka na sa listahan. Pero ang tanong: Alam ba talaga ng mga tao ang kanilang shini-share? Kung ang daan papunta sa premyo ay dumaraan sa pag-po-promote ng sugal o online gambling. Giveaway pa ba ito o isa na lamang pain?

Hindi naman talaga naging masama ang pagbibigay ni Ivana Alawi ng mga bagay-bagay, tulad ng iPhone 17. Ang problema ay ang impluwensiyang ipinagkatiwala ng milyun-milyong Pilipino sa kaniya. Sana’y pinag-isipan niya nang mabuti kung hanggang saan aabot ang kaniyang impluwensiya. Para sa ilan, ito ay para lang sa katuwaan, ngunit, para naman sa iba, ang pag-promote niya ang naging susi sa pagguho ng kinatatayuan nila.

Madalas nating batikusin ang mga politikong gumagamit ng pera, mga bagay, at minsan, mga pagkain para lamang makuha ang loob ng mga tao. Pero bakit kapag tayo na ang nasa posisyong tumanggap, tila halos walang umaangal? Kapag ba kasama tayo sa litrato, nawawala na ang pagiging totoo at ang pananagutan?

Base sa ulat ng Philippine Amusement and Gaming Corporation (PAGCOR) noong Hulyo 2025, umabot sa 32.117 milyon ang naitalang “Filipino electronic gaming players.” Ngayong taon, ilang numero na naman kaya ang nadagdag sa listahan ng PAGCOR? Ilang tao na naman kaya ang naabot ng Casino Plus sa bidyo ni Ivana at nasira ang buhay dahil lang nasipsip sila ng reyalidad na mas malaki ang tsansang ‘mananalo’ na sila sa sugal?

Hindi lahat ng kumikinang ay biyaya, minsan, isa lamang itong bagay na nakabalot sa mahahahaling kahon, ngunit ang laman ay sisirain ang buhay ninyo. Hindi si Ivana ang may problema—lahat ng influencers ay may karapatang mamili ng mga i-pro-promote nila na brand, pero may karapatan din tayong kwestyunin ang mga desisyon nila—lalo na kapag ang sakop ng impluwensiya nila ang milyong tao.

Ang iPhone ay tatagal lamang ng taon, ang pagiging lulong sa sugal ay tumatagal hanggang buhay. Sana'y ang ‘giveaway’ ni Ivana ay maging patunay na ang pagbibigay ay walang kaakibat na isang laro, na nakakaapekto sa araw-araw na buhay. Sa huli, ang tanong ay hindi kung sino ang mananalo—kundi kung ilang tao ang masisira nito.

The Frontman