LISTEN TO ARTICLESynthesized Narration • 0:00 / 0:00

Kailan natin makikita ang tunay na pangil ng hustisya para sa maniniil ng bayan? Maraming pasikot-sikot ang ginagawa upang ipihit sa tunay na pananagutan si Sara Duterte. Magmula sa desisyon na ipagpaliban ang pag-ugong ng kaso hanggang sa pagturing na 'unconstitutional' at ngayon naman ay ang paglamang ng mga mga umaalma sa pag-reject ng dismissal sa pagsibak kay Duterte bilang bise presidente. Klarong unti-unting minamanipula ng mga may kapangyarihan ang kaso upang ilihis ang tamang paglilitis sa akusado. Siyang tunay, mananatiling matamlay ang presensiya ng katarungan kung marami ang nakapalibot na galamay. Hindi na marapat pang ibinbin ang pagsisintensiya kay Sara. Kung tunay ngang walang kasalanan ang nasasakdal, mas magiging pabor ang trial upang mapatunayan ang kaniyang sarili na siya'y tunay na hindi nagkasala. Kung hindi kayang dinggin ang hiyaw ng masa sa ating bansa, nararapat lamang siguro na ipagkatiwala na ito sa hukumang walang pinapanigan at kinilingan. Mukhang hindi na uubra ang mapanlinlang nating sistema sa ganitong uri ng kataksilan. Walang saysay sa patas na batas ang palagiang pagpapaliban sapagkat malinaw itong anyo na sila'y tunay na may pinoprotektahan. Gayunpaman, nawa'y hindi pa tuluyang mamatay ang pag-asa para sa mga mambabatas na nananatili sa tama at may matibay na paninindigan. Kung patuloy na mabibigyan ng kapangyarihan at mananahan ang buwaya sa ating bayan, marahil ay mananatili tayong hindi makakalaya sa siklo ng katiwalian.