LISTEN TO ARTICLESynthesized Narration • 0:00 / 0:00

Sa mundo ng online sugal, masarap namnamin ang pagkapanalo—pero mahirap lunukin ang pagkatalo. Ngunit, ang mas mapait na reyalidad ay paano kung isang araw nalaman mo na ang salaping pinaghirapan mong igugol sa trabaho, mismong ahensya ng gobyerno ang tumaya at nagwaldas? May retirement funds pa nga bang makukuha ang mga kasapi o unti-unti nang naibabaon kasama ang pagkalugi ng puhunang hindi naman sila ang sumugal? Noong nakaraan lamang, isiniwalat ni Senator Risa Hontiveros ang isang kabalbalan na ginawa ng Government Insurance System (GSIS) matapos itong mag-invest ng mahigit isang bilyong salapi sa online gambling. Nakapagtataka at nakagagalit dahil sa kabila ng mga usapin tungkol sa pagpapatigil operasyon sa mga online sugalan, nagawa pa talaga ng GSIS na mag invest sa DigiPlus. Ayon din sa senador ay hindi rin ito rehistrado sa Securities and Exchange Commission o SEC. Isa lamang ang mga guro, pulis, bumbero, at marami pang government agencies ang buwanang kinakaltasan ng sahod para sa hulog nila sa GSIS. Bago makuha ang kaltas, araw-araw rin silang sumusugal, hindi sa online gambling kundi sa hamon ng buhay. Nakikipagsapalaran hindi lamang para sa kanilang sariling kinabukasan, bagkus para rin sa kanilang mga pamilya. Ngunit ano ang ginawa ng GSIS? Isinugal ang kanilang mga salapi. Nangyari ‘di umano ang pag-invest ng GSIS sa online gambling sa ilalim ng pamumuno ng ngayon ay kasalukuyang suspendido na si GSIS president Jose Arnulfo Veloso bunga sa paglabag nito sa alituntunin ng pamahalaan dahil din sa ₱1.45 bilyong investment sa Alternergy Holdings Corporation. Nakadidismaya rin dahil sinabi ni Pangulong Ferdinand Marcos sa isang panayam na wala siyang alam sa ginawang investment ng GSIS. Matatandaan na noong nakaraan sa naganap na State of the Nation Address (SONA) 2025, kung saan malaking pagkakataon sana upang mailapat niya ang mga plano tungkol sa problema sa online sugalan, ni isang salita—walang lumabas sa kanyang bibig. Parang siyang bingi at pipi, harap-harapan ng ginagawang mangmang ang mga Pilipino ng sariling ahensya ng pamahalaan na dapat ay nagpoprotekta sa kanila at marami na ang nalulustay, nababaon, at nagiging alipin ng sugal ngunit tila ay wala siyang nakikita at naririnig. Sa kabilang banda, sinabi ng GSIS na wala raw ‘di umano dapat ipag alala ang kanilang mga kasapi dahil secured pa rin ang pension o social insurance funds ng ahensya. Nananatili pa rin ang total assets na ₱1.88 trillion at handa raw silang maglabas ng mga dokumento para sa transparency ng mga ginawang investments. Ngunit, paano nila maibabalik ang malaking halaga ng salaping isinugal nila? Dahil ayon kay Senator Risa Hontiveros, lumabas na bumili ang GSIS ng shares sa DigiPlus sa halagang P65.30 ngunit nalugi ito at naging ₱13.68 na lamang. Halos milyon ang salapi na nawaldas. Anong klase ng ahensya ang gagawa ng ganitong uri ng pagtataksil sa mamamayan? Hindi ito dapat palusutin lamang. Dapat ay magkaroon pa ng mas malalim na imbestigasyon sa ahensya, sapagkat hindi lamang pera ang kanilang isinusugal, pati na rin ang kinabukasan ng mga kasapi nito. Dapat ay hindi lamang lagi isang senador ang kumikilos, magkaroon ng mas mabigat na numero sa imbestigasyon ukol sa bawat pondo na inilalabas o iwinawaldas. Dahil huwag natin hintayin na matalo ang mga mamamayang kasapi sa isang sugal na hindi naman sila ang tumaya at naglaro. Huwag din hayaan na ang inaasam nilang ipon para sa kanilang kinabukasan ay mabaon na lamang sa nakakalulong at nakakabitag na sugal.