LISTEN TO ARTICLESynthesized Narration • 0:00 / 0:00

Isang senador, isang dating bilanggo, isang politiko na may bahid ng korapsyon. Sa gitna ng paulit-ulit na kwento ng korapsyon sa ating bansa, isa na namang kontrobersyal ang nangibabaw—ang ‘di umano'y panloloko sa mga proyekto ng pamahalaan kung saan sangkot sa alegasyon ang ilang mambabatas, kabilang na rito si Senador Jinggoy Estrada. Nakabibigla? Hindi na. Nakagugulat? Hindi rin. Sapagkat sa sistemang ito, tila ang tunay na mukha ng gobyerno ay hindi serbisyo, kundi ang kanilang mga personal na interes. Ngunit bakit pa rin sila nasa pwesto? Dahil ang sistemang ito ay para sa trapo, hindi para sa tao. Ang masakit pa rito ay ang mismong sangay na dapat umapula sa hustisya at integridad ay siya ring nalulunod sa bahid ng kasakiman. Ang mga opisyal na pinili ng sambayanang Pilipino para maglingkod ay sila rin mismo ang mandurugas. Paano masasabing mayroong “pananagutan” kung wala namang nananagot? Ito ang reyalidad—sa ating bansa, ang kasalanan ay napapawalang bisa basta’t may koneksyon, pera, at pangalan. Walang saysay ang imbestigasyon kung wala namang naparurusahan. Walang silbi ang hustisya kung ang mga makapangyarihan ay laging ligtas. Ang pera ng taong bayan na dapat ay napupunta sa mga proyekto para sa kaligtasan at kabuhayan ng bawat Pilipino, ito ay napupunta sa bulsa ng ilang opisyal. Ginagawa ito nang harap-harapan na tila ba walang kinatatakutan. Bakit? Sapagkat alam nilang walang mananagot. Maraming beses na tayong pinangakuan ng reporma. Maraming ulit na tayong pinatahimik ng mga matatamis na salita. Pero sa huli, ang katotohanan ang nangingibabaw. Hindi batas ang nasusunod, kundi kapangyarihan. Hindi hustisya ang umiiral, kundi koneksyon. At hindi serbisyo ang layunin, kundi ang kumita. Ang korapsyon sa pamahalaan ay hindi na bago, pero ang patuloy na pananahimik natin ay nagbibigay-lakas sa mga trapo na patuloy na namimihasa. Hindi sapat ang pagkadismaya — kailangan ng paninindigan. Hindi sapat ang pagkamuhi — kailangan ng pagkilos. Kung mananatili tayong tahimik, tayo rin ang magiging kasabwat ng sistemang binabalewala ang dangal at kapakanan ng mamamayan. Kaya't ngayon ang panahon upang gisingin ang sarili, tanungin ang ating konsensya, at ipaglaban ang gobyernong tunay na para sa tao.