LISTEN TO ARTICLESynthesized Narration • 0:00 / 0:00

Pagliyab ng Gusali o ng Katotohanan? Kaduda-dudang isipin na kung kailan umiingay ang isyung kinahaharap ng Pilipinas tungkol sa korapsyong nagaganap sa bansa dahil sa mga dinadayang proyekto ay sumabay ang pagsiklab ng gusali sa Department of Public Works and Highways (DPWH). Mistulang may itinatago at pilit inililibing ang katotohanan upang maisalba ang pangalang pinahahalagahan. Kakaibang tiyempo, kung kaya’t hindi maiwasang maitanong sa sarili, “aksidente nga ba o may lihim na ikinatatakot maibunyag at malaman ng publiko?” Nitong ika-22 ng Oktubre, 2025, ay nagliyab ang gusali ng DPWH sa Quezon City. Ayon sa Bureau of Fire Protection (BFP), nagsimula ang sunog sa DPWH Bureau of Research and Standards (BRS). Dahil biglang pumutok na isa umanong kompyuter sa nasabing tanggapan. Kung titingnang mabuti, hindi lamang gusali ang nagliyab sa araw na iyon, pati na rin ang tiwala ng taumbayan. Hindi ka ba nanghihinala? Sa tagal na nariyan ang kompyuter o teknolohiya ay bakit tila ngayon lamang ito nagwala? Marahil may ebidensyang nais mawalanupang ang kasiguruhang ligtas sila sa mata ng masa ay matatamasa. Naisalba nga ba ang Reputasyon? Kapag ang ahensya ay nasunog, reputasyon, pangalan ay damay rito. Kung kaya’t ang balitang pagkasunog ng gusali ng DPWH ay kukuwestiyunin ang naturang kredibilidad nito. Isinaad ni DPWH Assistant Secretary Melody Villar na naisalba ang mga kritikal na datos. Walang anumang dokyumento ang nadamay sa sunog, lalo na ang pag-iimbestiga tungkol sa flood control projects. Subalit paano ito mapapatunayan? Gayong kinukuwestiyon ang proyektong inyong isinumiteng natapos na kahit hindi naman. Bilyon-bilyong pera ang nasayang sapagkat naibulsa sa halip na para sa masa. Sa paanong paraan ninyo kami mapapaniwala? Naisin niyo mang isalba ang reputasyong inaalagaan, ay hindi niyo ito maisasagawa, dahil sa mata ng publiko, hindi katiwa-tiwala ang mga salitang lumalabas sa inyong bunganga. Kapangyarihan niyo ay may Hangganan! Hindi ito matatapos hangga’t walang nananagot. Kung ang pansamantalang pagtumpok ng apoy ay nagdala ng pagduda sa katotohanan, maaring sa simpleng galaw ninyo ay mas mananaig ang pag-uusisa ng mamamayan. Hangga’t may masang handang manuri, magtanong, at maningil, ang inyong kapangyarihan ay malalaos din. Dahil sa baluktot niyong sistema, narito ang mga tao upang ang kataka-taka niyong ginagawa ay bigwasin at mauwi sa hinahangad na hustisya.