LISTEN TO ARTICLESynthesized Narration • 0:00 / 0:00

Sa mga nagdaan na buwan—halos naging bahagi na ng araw-araw na buhay ng mga estudyante ang paglikas dahil sa takot at pangamba. Hindi lamang ngayon, ngunit taon-taong nagkakaroon ng kaliwa’t kanan na bomb threats sa mga unibersidad. Hindi lamang takot ang bunga nito, kundi malaking abala sa mga guro at estudyante. Ang malaking tanong—tanging biro o “prank” lamang ba ang tanging layunin ng mga bomb threats na ito o isa ng panibagong taktika upang pigilan ang mag-aaral sa loob ng mga unibersidad na magsalita, magtanong, at manindigan? Halos 17 na mga unibersidad na ngayong taon ang nakaranas ng malawakang bomb threats. Karaniwang nakakatanggap ng mensahe mula sa email ang mga unibersidad. At nito lamang Nobyembre 13, 2025 araw ng huwebes—nakaranas din ang University of the Philippines, Manila (UP Manila) ng nasabing bomb threat. Ang isang normal na araw ay nababalot ng pangamba at higit sa lahat, abala sa mga guro at mag-aaral na nagmula pa sa malalayong barangay o lugar na napipilitan umuwi pabalik dahil sa mga hindi matukoy kung sinong nagpasimulang bomb threat. Ang mga klase na nakatakdang gawin sa araw na ‘yon ay napalitan na lamang ng pagkasindak at panik. Ngunit ang malaking tanong, panibagong taktika na nga ba ang mga bomb threats sa larangan ng pulitika upang maghasik ng takot sa mga estudyante? Hindi na nakapagtataka dahil isa ang mga unibersidad kung saan malayang nagkakaroon ng karapatan ang mga estudyante na makilahok sa malawakang pagkilos at pagpapahayag ng boses tulad ng mga malawakang protesta laban sa pamahalaan. Kaya hindi natin maalis ang posibilidad na ginagamit nga ito bilang panakot at upang tuluyang buwagin ang academic freedom sa loob ng mga unibersidad. Kabilang na dito ang UP, dahil kung ating titignan ang kasaysayan, mula sa First Quarter Storm, Diliman Commune, at paglaban sa Martial Law—ay patunay ng papel ng akademya sa pagsulong ng kilusang panlipunan. Sa kabilang banda, malaki rin ang papel ng social media sa pagpapakalat ng mga mensaheng konektado sa bomb threats—karamihan din dito ay puwerang “prank” lamang. Bagama’t ang iba nga ay layunin lamang ay “prank”, ito ay isang seryosong usapin pa rin. Kalayaan, karapatan, at kaligtasan ng mga mag-aaral ang nakasalalay dito. Sa kabuuan, kahit karamihan sa mga bomb threats ay walang nananagot, mahalagang ipaalala na may kaparusahang kaakibat ito. Ang pangunahing batas sa Pilipinas laban sa pekeng bomb threats ay Presidential Decree 1727, na nagpaparusa ng hanggang ₱40,000 multa at limang taon na pagkakakulong sa sinumang malisyosong nagpapakalat ng maling impormasyon tungkol sa bomba. Mas mabigat ang parusa kung kaugnay ito ng terorismo dahil maaaring saklaw na ito ng Anti-Terrorism Act of 2020. Kaya hindi ito dapat ituring na biro lamang, hindi rin ito dapat makasanayan at isawalang bahala dahil ang mga ganitong pangyayari ay itinuturing na rin taktika upang maghasik ng takot sa mga mag-aaral na bumoboses para sa masa at bayan.