LISTEN TO ARTICLESynthesized Narration • 0:00 / 0:00

Ang bawat isa ay binigyan ng pinto upang bigyang pagkakataong mabuhay, magmahal, magtrabaho, at maging masaya. Sa kalayaang tinatamasa, may kalayaan nga pa rin ba tayong humusga? Sa katakot-takot na pangungurakot ng mga kawani ng gobyerno, sila ay nangako na pagsisilbihan tayo, bilyon-bilyong pondo ang nawaldas at ipinagkait sa bawat Pilipino. Mga pilipinong nawalan ng tirahan, nagkasakit, at namatay. Ang hustisya na hindi maibigay sa taong nahihirapan, at ang kalayaang ibinibigay sa taong may katungkulan. Kakampi man ang nakikita, tila nagbabalat anyong isda. Sumisingaw pa rin ang hustisya na naibibigay lamang sa taong may kaya—hindi sa taong kaaya-aya. Ang pagpatay sa taong may kasalanan ay kinakailangang may mabigat na ebidensya. Hanggang ngayon hindi pa rin legal ang pagpatay o Death Penalty na ipinapataw sa mga taong may mabigat na pagkakasala, dahil hindi ito makatarungan at naniniwala ang iba na kaya pang magbago ng akusado. Partikular na sa ibang bansa ang Death Penalty tulad ng China, Iran, at North Korea. Pera kapalit ng pera, buhay kapalit ng buhay. Nakapanghihinang isipin na sa kasalanang unti-unting sumisingaw dahil sa bilyong pondo ang nawawala, may buhay rin kayang tumataya? Kung hindi maibibigay ang hustisya sa isa, paano maibibigay sa iba? Kung buhay ang kapalit ng mga nagkasala sa pulitika, sino ang maglilitis sa kanila? Hindi ba't kapwa rin nila pulitika? Ang katarungang hinahangad ay makikita lamang kung may magpapatupad. Kung may ninakaw dapat ibalik, kung may pinatay hindi kailangang may patayin ulit. Ang bilang ng mga taong masama ay hindi mababawasan sa pagpatay ng mga taong nagkasala. Ang hustisya ay dapat magmula sa gobyerno at susundan ng tao. Hindi kasagutan ang pagpatay sa taong may kasalanan, kung kikitilin agad ang mga taong nagkasala, hindi sila magdurusa tulad ng taong ginawan nila ng masama. Ang paghihirap ay nagmula sa buhay, ang katahimikan ay matatapos sa pagpatay. Hindi kasagutan ang pagkitil ng buhay, dahil kung sa tingin ng iba tapos na ang lahat sa oras ng pagpanaw, hindi. Dahil doon pa lamang nagsisimula ang kalbaryo ng buhay, habang buhay ang taong nangurakot hindi sila makakatakas. Kung mamamatay man sila, sana sa takdang panahon na, sa oras na bayad na ang kasalanang ginawa nila. Mababayaran lamang ang kasalanan kung mananatili silang buhay, mabubuhay silang ramdam ang panghuhusga, mga panghuhusga na sumasalamin sa katiwaliang ginawa nila. Mabubuhay sa galit ng tao na nagmula sa kanila.