LISTEN TO ARTICLESynthesized Narration • 0:00 / 0:00

Sa bansang naghahari ang kasakiman na kahit kaban ng bayan ay ginagawang tuwalya, pilit na pinipiga at pilit na tinutuyo, kasing layo ng buwan kung tanawin ang pag-asa patungo sa isang pulido na gobyerno. Isa ang nakapanlulumo na korapsyon sa Flood Control Projects sa mga unti-unting pumupukaw sa mga Pilipino na hindi lamang galit o inis ang dapat maramdaman kundi ay poot at pagkamuhi sa bayang ito. Naging isang sumpa na ang pagiging isang Pilipino dahil sa kadungisan na binabahid ng mga salanggapang na namamahay sa ating pamahalaan. Takot na takot pa tayong mga Pilipino sa tuwing may bagyo at baha, pero mas higit na malulunod pa pala tayo sa nakalulunod na pagnanakaw sa pondo na dapat ay magsasalba sana sa atin sa tuwing mararanasan ang hagupit ng baha na ilang taon na rin tayong kinakawawa. Sa bansang Pilipinas na kung saan mas malaki ang inilalaan sa Flood Control Projects, kumpara sa ilang ahensya ng pamahalaan tulad na lamang sa sektor ng agrikultura at pangkalusugan makikita ng lahat kung paano unti-unting ginagawang biro na lamang ang kaban ng bayan. Katulad na lamang noong kabilang taon kung saan ayon sa impormasyon mula Department of Budget and Management (DBM), umabot sa ₱248.08B ang inilabas na salapi para sa flood control projects higit na mas malaki sa ₱195B lamang na nakalaan para sa sektor ng ating agrikultura . Simula ₱128.96B (2022), ₱182.99B (2023), ₱244.57B (2024), at hanggang sa umabot na ng ₱248.08B (2025). Makikita kung gaano lumala ang kanilang kasakiman para kurakutin ang pondo ng bayan. Parang isang pirasong tinapay, hati rito, at hati roon. Parang napakadali na lamang ibulsa ng salaping pinaghirapan ng bawat mamamayan, nakapagtataka dahil kahit tayo ay namulat na, sadyang walang pakundangan kung mangupit. Dito sa Pilipinas, walang puwang sa loob ng gobyerno ang mga pulitiko na may katarungan, paninindigan, at malasakit sa bayan, ngunit ang mga mangmang at tanging salapi lamang ang nais ay siyang naghahari at nagpakabubusog sa paglamon ng napakataba na pondo ng bayan ngunit sana naman ay magkaroon ng kaakibat na pananagutan lalo na ang mga matatakaw kumain. Sapagkat, ‘wag tayong pumayag na maging bilanggo habang buhay ng madungis na sistema, tayo ay unti-unti ng natututo kumawala. Sa kabilang banda, nararamdaman na ang presensya ng pangulo ngayong taon sa mga nauungkat na baho tungkol sa proyekto. Noong nakaraan lamang, nakita na niya ang mga multong proyekto, isang halimbawa ang ghost flood control projects sa Bulacan. Ngunit ang sigaw ng lahat, ano na pagkatapos nito? Hanggang galit na lamang ba dahil kahit bawasan pa ang nakatakdang budget para sa Flood Control projects, ito ay walang kwenta dahil hindi pa rin mailalagay sa dapat nila kalagyan ang mga nasa likod nito, dapat pagbayaran ang kasakiman at kasilawan sa pera Tayo ay huwag na ulit matulog at pumikit tulad ng isang mantika. At higit sa lahat, huwag natin hayaan na mamatay ang apoy sa kandila, patuloy natin itong sindihan at patindigin hanggang sa maabot ang katarungan. Sapagkat, hindi kaya tabunan ng pagkalimot ang ginawang kabalbalan sa ating bayan, sa kaban, at higit sa lahat sa ating mga kababayan na patuloy pa rin nagdudusa sa galit ng nakakatakot na hagupit ni baha.