LISTEN TO ARTICLESynthesized Narration • 0:00 / 0:00

Tuwing ako ang tinatawag sa aming recitation, halos maihi ako sa pantalon ko dala ng nerbyos. Alam ko naman ang sagot sa katanungan ni ma'am, subalit kailangan kong sagutin sa wikang Ingles. Nakakatawang isipin lang na sa tuwing Buwan ng Wika, todo ang suporta ng mga guro at estudyante sa pamamagitan ng pagsuot ng barong at saya, ngunit pagdating sa klase? Ingles na naman ang ginagamit na tila ba'y nagiging banyaga tayo sa sarili nating wika. Inaprubahan ng Kagawaran ng Edukasyon (DepEd) ang polisiyang Executive Order No. 210 na naglalayong paigtingin ang paggamit ng wikang Ingles bilang medium of instructions sa pampubliko't pribadong paaralan. Batid ko namang makatutulong ito sa paglinang ng aming kakayahan, subalit paano naman ang mga katulad kong estudyante na nahihirapan pa ring magsalita ng Ingles? Aminin man natin o hindi, minsan kung sino pa ang mga mas dalubhasa sa Ingles, sila pa ang pinapaboran ng mga guro. Sila ang mga isinasali sa mga patimpalak, at sila ang may maraming oportunidad. Ito ang mapait na katotohanan na kahit sabihing ipinagdiriwang ang Buwan na siyang nag-angat sa atin ng pagkakakilanlan, mananatiling ingles pa rin ang mangingibabaw sa paaralan. Sa katunayan, hindi naman talaga dapat mababa ang ranggo ng Pilipinas sa Programme for International Student Assessment (PISA) kung ang wika na sana ay ginagamit sa mga pagsusulit ay wikang Filipino. Ang mga Bansa nga tulad ng Japan at South Korea ay nakasalin sa mismong lenggwahe nila ang mga pagsusulit nila sa halip na Ingles. Kaya ang resulta? Nahihirapan ang mga mag-aaral na umunawa lalo na kung marami pang malalalim na salita. Bagama't responsibilidad nating aralin ang wikang Ingles at dapat kahit papaano ay matutuhan natin ang tamang pakikipagtalastasan gamit ito, huwag din dapat kalimutan ang paggamit ng Filipino dahil maliban sa ito ay sumisimbolo ng ating pagka-Pilipino, ito rin ang tumutulong sa atin upang makipag-ugnayan sa mga taong may mga iba't ibang diyalekto. Isa pa, kung madalang ang paggamit sa wikang Filipino, ano pang saysay kung tatawagin tayong Pilipino? Ito na ang panahon upang pagbigyan ng mas malaking pansin ang pagpapaunlad ng kasanayan sa Filipino. Hindi naman ibig sabihin nito na hindi na natin kailangang matuto ng Ingles, kailangan pa rin natin ito para sa pakikipag-ugnayan sa ibang bansa. Ngunit sana hindi lamang sa Buwan ng Wika ito pinahahalagahan, kundi dapat ito'y isinasabuhay sa pang-araw-araw. Higit sa lahat, ang simpleng pagtatanong kung maaaring magtagalog tuwing recitation ay hindi dapat gawing isang malaking isyu at mas lalong hindi dapat gawing sukatan ng katalinuhan. Dahil kung sasabihing pangmatalino lamang ang Ingles, mas gugustuhin ko pang huwag maging matalino. Kung tutuosin, hanggang ngayon ay pautal-utal pa rin akong makipagtalastasan sa Ingles. Lalo na kung recitation? Naku! Mas mahihirapan ako. Kaya ang lagi kong tanong, "Ma'am, P'wedeng Magtagalog?" Upang maipahayag ko, bitbit ang mataas na kumpiyansa, ang saloobin ko.