LISTEN TO ARTICLESynthesized Narration • 0:00 / 0:00

Sa panahon ngayon, maraming tao ang naghahanap ng paraan ng kanilang pagkakakitaan. Isa ang online gambling sa mga naiisip nilang paraan upang magkaroon ng pera. Pero ito ba ay nakakatulong, o ito ay nakakaubos lamang ng kabuhayan dahil sa pagkasugapa? Ang online gambling ay laro sa internet kung saan ang bawat tao ay maaaring magsugal tulad ng sa BingoPlus at Tongits Go. Kahit menor de edad, naglalaro sila at ginagawang kabuhayan. Para sa akin, hindi ito nakakatulong sapagkat mas nalululong ang mga kabataan, at maski ang kanilang allowance ay pinantataya rito. Nakadidismaya naman ang inihayag ng isang party-list representative na 32% ng mga kababaihan ang nauubos ang kabuhayan dahil sa pagkasugapa sa online gambling. Sa aking opinyon, dapat itigil ang paglalaro ng online gambling sapagkat walang pinipiling tao ang pwedeng malulong dito. Isa ring dahilan ay ang madaling pag-access sa app sa cellphone upang makapagtaya. Noong Hulyo 4, 2025, nagsampa si Sen. Juan Miguel Zubiri ng panukalang batas na pinamagatang Anti-Online Gambling Act of 2025, kung saan tinukoy niya ang online gambling bilang isang “silent epidemic” na tahimik na sumisira sa mga Pilipino, lalo na sa mga kabataan at sa mga pinaka-bulnerableng sektor. Para sa akin, hindi lamang ito nagbibigay ng problema sa pera, kundi nagbibigay din ito ng problema sa ating kalusugan. Ang paglalaro nito ay nagdudulot ng stress sa mga manlalaro, at nauuwi pa sa pagpapakamatay dahil sa kanilang pagkatalo. Ayon sa datos ng Department of Health at PNP Anti-Cybercrime Group, dumarami ang kaso ng pagkabaon sa utang at depresyon na kaugnay sa online gambling, kung saan may mga naitalang insidente ng pagpapatiwakal matapos mawalan ng malaking halaga sa pagtaya. Kaya sa aking opinyon, dapat talagang itigil ng mga tao ang paglalaro ng online gambling, sapagkat ito lamang ay nagbibigay sa atin ng problema, hindi lamang sa pera o kalusugan, maging sa kabuhayan ng bawat isa. Kaya ating isaisip na may mas mabuting paraan upang makahanap ng kabuhayan, katulad ng pagtatrabaho nang maayos. Sapagkat ang online gambling ay hindi nakakatulong sa atin. Atin tandaan: walang nananalo sa larong ito—lahat tayo ay talo.