LISTEN TO ARTICLESynthesized Narration • 0:00 / 0:00

Sa isang lipunang uhaw sa pagbabago, nananatili pa ring bulag ang mga Pilipino sa reyalidad. Nananatili pa ring bagsak ang ekonomiya at mahirap ang maraming Pilipino dahil sa pagsamba at pag-idolo nila sa mga pulitikong halang ang kaluluwa. Tila isang sakit na kung maituturing ang pagiging panatiko ng mga Pilipino. Bakit hanggang ngayon ay hindi pa rin natututo ang mga Pilipino sa mga nakaraang administrasyon at sa pagkakamali nila? Korapsyon ang isa sa pinakamatagal na nating kalaban at ng mga kapwa ko Pilipino. Ito rin ang isa sa dahilan kung bakit naghihirap at bagsak ang ekonomiya ng ating bansa. Isa si Vice President Sara Duterte sa kinikilalang korap na politiko. Ayon sa Philstar, ginastos niya ang ₱125 milyong peso sa loob lamang ng 11 araw at ito ay kinompirma ng Commission on Audit (COA) noong Setyembre 2023. Ngunit imbes na magalit ang ibang Pilipino sa kaniya, pilit pa rin nilang ipinagtatanggol ang trapong sumisira sa bansa. Sa kabila ng mga ebidensyang inilabas ng senado at ng COA ay nanatili pa ring mangmang, panatiko at nagbubulag-bulagan ang mga Pilipino sa mga kamalian ng kanilang iniidolong politiko. Ang hindi maintindihang pag-idolo na ito ay nagpapakita ng mas malalim na problema sa ating kultura at sistema. Kapag nakatanggap ang mga Pilipino ng kahit maliit na pabor o tulong mula sa isang pulitiko, pakiramdam nila ay obligasyon nilang suportahan sila kahit pa alam nilang sila ay magnanakaw at mapagsamantala. Isa sa itinuturing na dahilan ang ‘utang na loob’ kung bakit patuloy na sinusuportahan at iniidolo ng mga Pilipino si Sara Duterte. Ang kaniyang ama na dating Pangulo ang dahilan kung bakit tinitingala nila ang pamilyang Duterte. Isa ang kampanya kontra-droga noong 2016 ng kaniyang ama kung bakit hinahangaan siya ng mga Pilipino, sapagkat napakulong at napatay niya ang mga drug addict at mga pusher noong nakaraang administrasyon. Ayon sa mga datos, humigit kumulang 12,000 inosenteng Pilipino ang kinitilan ng buhay dahil sa kampanya kontra-droga na para bang walang pakialam ang administrasyong Duterte at ang mga pulis. Maraming Pilipino ang kulang sa edukasyon at komprehensyon. Maraming Pilipino rin ang hindi marunong kumilatis ng isang politiko. Batay sa inilabas na datos ng Functional Literacy, Education, and Mass Media Survey (FLEMMS) noong 2024, mahigit 18.9 milyong Pilipino ang hindi marunong magbasa at magsulat. Hindi na kataka-taka kung 18.9 milyong Pilipino ang hirap pa ring bumasa, sumulat, at umintindi ng mga bagay-bagay. Hindi na rin kataka-taka kung ang pinipiling suportahan ng mga Pilipinong kulang sa edukasyon ay ang mga matutunog na pangalan ngunit gahaman sa kapangyarihan tulad nina Marcos Jr., Camille Villar, Bong Revilla, at iba pa. Ang mga Pilipinong kulang sa kaalaman at edukasyon ay ang puntirya ng mga buwayang gutom sa kaban ng bayan, mga buwayang gahaman sa boto at gahaman sa pwesto. Hindi nakakapagtaka kung bakit patuloy pa ring iniidolo o sinasamba ng mga Pilipino ang mga trapong politiko — dahil sa kanilang mga mababango at sa mga pangakong hanggang ngayon ay nakapako pa rin sa kawalan tulad ng pagkakaroon ng mga trabaho, pagpapagawa ng mga sirang imprastraktura at kung ano-ano pa mang mga pangako na sa huli ay napako lang din. Umaasa ang mga Pilipino na makakakuha ng pabor, trabaho, o iba pang benepisyo mula sa kanilang mga idolo. Isa sa mga binabanggit ng mga politiko tuwing eleksyon ay ang pagbibigay ng mga trabaho para sa mga Pilipinong walang trabaho. Base sa datos mula sa Philippine Statistics Authority (PSA) 1.9 milyong Pilipino ang unemployed o mga walang trabaho mula sa 2.03 milyong Pilipinong walang trabaho noong Mayo 2025. Bawat Pilipino ay nagsasabi na may mga politiko na trapo ay mga politiko ring tapat na naglilingkod para sa bansa at sa mamamayan. Sinasabi rin nila na dapat ay bigyan ng pagkakataon ng mga trapo na ipakita ang kanilang pagiging isang politiko at huwag agad husgahan basta-basta. Sa kabilang banda, hindi sa lahat ng pagkakataon ay dapat bigyan ng tsansa ang mga buwayang politiko, sapagkat karamihan sa kanila ay hindi tunay na naglilingkod para sa bayan at sa mga mamamayan. Ang iba sa kanila ay naglilingkod sa iisang pamilya, naglilingkod sa ibang bayan o kaya naman ay may pinagtatakpan na sikretong nangangalingasaw na sa baho. Tumatakbo hindi para maglingkod, kundi para magpayaman at pagkasawaan ang pera ng taumbayan. Ngunit nananatili pa ring bulag ang maraming Pilipino kahit harap-harapan na silang ninanakawan. Ang pagbibigay ng pagkakataon ay maganda, ngunit hindi ito nangangahulugan na dapat tayong magbulag-bulagan sa mga maling gawain. Ang pagsuporta sa mga buwaya ng pamahalaan ay isang hadlang upang umangat at makalaya sa kadenang nakapulupot sa bayan — kadenang humahadlang sa pagbabago. Dapat nang baguhin ang pag-iisip ng mga Pilipino sa pagpili ng kanilang iniidolo, hindi lamang matunog na pangalan ang kailangan — kailangan din ay may pinag-aralan, walang kasong kinakaharap, walang ninanakaw na milyones sa kaban ng bayan at kailangan ay matalino at kayang hawakan ang isang bansa. Kailangan din natin maging mapanuri sa mga balitang tumatalakay sa kanilang pagkakamali, ipaglaban ang karapatan ng mga Pilipino, at panagutin ang mga gahaman na trapo sa gobyerno. Ang edukasyon, transparency, at accountabilty ang susi at solusyon sa problema na ito. Kung hindi tayo kikilos, patuloy lang tayong mamomroblema sa mga kamay ng mga pulitiko na punong puno ng kasakiman, ambisyoso, at mapanlinlang.