LISTEN TO ARTICLESynthesized Narration • 0:00 / 0:00

Iisa lamang sa problema ng bansa ang pagkalat ng mga maling impormayon dahil ang mismong problema ay ang walang katapatan ng marami kabilang na ng mga nanunungkulan sa gobyerno. Bilang isang mamamayang Pilipino, marami sa ating mga katanungan ang hindi pa nabibigyang kasagutan. Kabilang dito ay kung saan ba talaga napupunta ang trilyon-trilyong kaban ng bayan, kung ang ating mga buwis ba ay ginagamit para sa mga proyekto, at kung sa mismong mga taumbayan talaga napupunta ang pondo, hindi sa mga sindikato. Maganda mang isipin na layunin ng gobyerno na wakasan ang mga maling impormasyon lalo na sa panahon ngayon na mas pinadali na lamang ang ang pagkalap nito gamit ang teknolohiya, palihis pa rin ang atensyon nila sa mismong problema na kinakaharap ng bansa. Ang House Bill 3799 ay panukalang batas na inihahain sa Kongreso ng Pilipinas sa pagkakataong maging ganap na batas. Sa Seksiyon 4 ng House Bill na ito, nakasaad na may karampatang parusa na anim (6) hanggang labindalawang (12) taon ng pagkakakulong ang sinumang susuporta at magpapalaganap ng maling impormasyon. Kabilang na rito ang multa na ₱500,000 o hindi tataas sa dalawang milyon o pareho ayon sa magiging desisyon ng korte. Subalit, hindi ito ang isa sa mga napakalaking problema sa bansa na agarang dapat na masolusyunan. Ang pagkalat ng maling impormasyon ay madali lamang na tuldukan. Maraming mga mamamahayag ang nananaliksik at nagwawakas sa mga maling impormasyon na ito sa loob ng midya. Ang mga basehan na sinusunod nila ay ang prinsipyo ng 'tipping point.' Kung 'viral' na ang isang impormasyon, makikita na sa iba’t ibang social media sites, at kung nagmula ang isang pahayag mula sa isang importanteng personalidad, agaran naman itong sinisiyasat ng mga mapagkakatiwalaang mga mananaliksik. Masosolusyonan agad ang pagkalat ng mga maling impormasyon kung lahat ng Pilipino ay marunong gumamit ng teknolohiya at midya sa tamang paraan. Subalit, dapat lamang na isaisip na hindi ito ang tanging maling impormasyon na kailangan nating labanan bilang mga Pilipino. Ito ay ang kawalan ng katapatan ng mga taong nanunungkulan na makikita sa maling pagsasapapel ng pondo at kaban ng bayan. Kung ipagpapatuloy ang pagsasabatas ng House Bill na ito, magiging sobra-sobra ang parusang ito kung hindi magiging patas ang sistema. Dapat na kahit politiko, kung maling impormasyon ang pinapakalat lalong-lalo na sa pondo o proyekto at kinukubli sa taumbayan ang karapatang makita kung ano ang mga tamang impormasyon tungkol sa iba’t ibang programa一bigyan sila ng parehong paghuhusga. Hanggang sa hindi mapagtanto ng mga mambabatas ang mismong ugat ng mga maling impormasyon, mas lalabo ang linya sa pagitan ng kung ano ang tama at mali. Walang magtatanong kung ang tamang impormasyon ay ibinibigay. Walang mga maling hinala ang kakalat kung magiging tapat ang lahat. Hanggang sa mapagtanto ito ng gobyerno, bahagya lamang nating nasosolusyunan ang mismong problema sa maling impormasyon. Lahat ito ay nangyayari dahil palihis ang kanilang atensyon.