LISTEN TO ARTICLESynthesized Narration • 0:00 / 0:00

Ang mga politiko dapat ang naglilingkod sa bayan; hindi mga politiko ang paglilingkuran ng mamamayan. Ngunit tila kabaliktaran ito ng kasalukuyang ginagawa ng ating Bise Presidente Sara Duterte. Noong nakaraan na kaliwa’t kanan ang pag-ulan at pagbaha, ay siya rin pagbaha at pag usbong ng mga isyu sa korapsyon ukol sa flood control project. Ngunit nanatili siyang malayang lumilipad sa kanyang mga byahe patungo sa ibang bansa na tanging pansariling interes lamang. Dumepensa naman ang bise presidente at sinabing ang kanyang mga paglabas sa bansa ay para tulungan ang ating mga overseas Filipino workers. Ngunit, alam ng karamihan na ito ay kasinungalingan at pansariling interes lamang lalo na’t talamak ang mga nagaganap na pagpupulong, rallies, at protest sa ibang bansa ng mga Pilipino na Duterte allies dahil sa pagkakulong ng kanyang ama na si former President Rodrigo Roa Duterte. Ayon kay Palace Press Officer Undersecretary Atty. Claire Castro, hindi ‘yon malinaw na rason dahil habang ang ating bansa ay talamak ang mga problema na hinaharap, tinatalikuran niya ang kanyang mga responsibilidad. Nakalimutan na siguro ng bise presidente na hawak pa rin niya ang pangalawang pinakamataas na posisyon sa ating bansa. Sinabi rin niya na tanging paninira ang ginagawa ng bise presidente kay Pangulong Ferdinand Marcos sa mga pagharap nito sa ating overseas Filipino workers. Marami na siyang responsibilidad na tinatakasan. Matatandaan noon na habang humaharap sa samu’t saring krisis o problema ang Kagawaran ng Edukasyon, doon pa talaga niya naisipan na magbitiw sa kanyang pwesto bilang DepEd Secretary. Sa kasalukuyang ginagawa niya ngayon, pinapakita lamang niya ang sikretong taktika na kanyang gamit, kapag mahirap ang laban, talikuran at iwanan na lamang ang tungkulin. Tama nga ang mga mamamayan na ang politika sa Pilipinas ay tila isang laro na lamang kung ituring ng mga politiko. Sa kabilang banda, iginiit ng Office of the Vice President (OVP) na hindi naman daw public funds ang gamit ng bise presidente sa kanyang mga “out of countries travels” kaya wala siyang obligasyon na sabihin o gumawa ng report kung saan siya pumunta at kung ano ang rason ng kanyang paglabas sa bansa. Ngunit, walang sikreto ang kayang itago kapag ang mga tao ay naumay na sa kasinungalingan. Lumabas na gumasta ng mahigit P7 milyong salapi mula sa Office of the Vice President (OVP) si Duterte para sa security lamang ng kanyang travels. Kasinungalingan na patuloy na naman muli malulusutan. Kung ikukumpara sa isang laruan o bagay ang bise presidente, siya ay parang isang saranggola. Malayang lumilipad sa himpapawid ngunit nakalimutan ang kanyang tali sa lupa na sumisimbolo sa tiwala ng mga Pilipino. Kahit gaano pa kataas ang kanyang lipad, kung mapuputol din naman ang tali o tiwala ng ating mamamayan, babagsak at babagsak pa rin siya sa lupa tulad ng kanyang pagbagsak sa mga responsibilidad na dapat ay kanyang hinarap.