LISTEN TO ARTICLESynthesized Narration • 0:00 / 0:00

Tulad ng isang kamiseta, kapag ang dungis ay naipahid, mahirap na maalis. Kahit anong linis kung sadyang madungis, ito ay walang saysay. Kung sa totoong mundo, kapag gumawa ka ng kabalbalan, mahirap nang tapalan dahil nariyan palagi ang sambayanan, hinding-hindi niya makalilimutan. Sa mundo ng pulitika, kahit gaano pa sila magdilang-anghel para ibaon ang mga kasalanan, wala na silang lugar sa isang bansang namulat at hindi na muli pang pipikit. Naging pulutan hindi lamang ng midya kundi maging ng sambayanan ang unti-unti nang paglitaw ng mga katiwalian sa salapi na inilaan para sa flood control projects at isa na lamang ang mag-asawang Sarah and Pacifico Discaya na ‘di umano’y nabusog sa mga proyekto. Matatandaan na noong nakaraan lamang ay naging suki na rin ang dalawa ng pangbabatikos dahil sa isang interview kung saan kanilang ibinida ang mga sasakyan na halos milyones ang katumbas. Mga nakakalulang halaga kung ituring, pero ang tanging sigaw ng sambayanan: nasaan ang mga proyekto na kanilang ipinangakong gawin? Ang mga Discaya ay kilala sa kanilang mahiigit siyam na construction company na kumita hindi lamang ng milyon kundi bilyones sa mga proyekto mula sa gobyerno at ang ilan dito ay konektado di umano sa mga multong proyekto ng flood control. Sa ginanap na Senate blue hearing committee noong kabilang araw, ibinunyag ng dalawa na ang ilan sa mga opisyal ng gobyerno ay humihiling ng porsyento ng hindi bababa sa 10% at hindi tataas sa 25% sa bawat kontrata. Hindi lang ‘di umano sila ang dapat sisihin kundi maging ang mga nasa loob mismo ng pamahalaan. May mga pangalan na inilapag, ngunit tanggi rito, tanggi roon. Walang saysay ang bawat kuda kung walang kaakibat na katunayan. At higit sa lahat, walang kuwenta ang imbestigasyon kung sa huli ay walang mananagot. Poot at pagkamuhi na ang nararamdaman ng mga mamamayan sa ngayon dahil sa gahaman na pagwawaldas sa ating kaban. Ang mga nagmamalinis ay inaakalang tayo ay katulad pa rin ng dati, mga mangmang na basta na lamang maniniwala sa kanilang manipuladong mga salita at pabiktimang paliwanag upang takasan ang kadungisan na pilit nililigpit ang kalat na kanilang idinulot hindi lamang sa bansa kundi maging sa bawat mamamayang Pilipino na kanilang pinagtaksilan at sinamantala. Sa kabilang banda, sinabi ni Marcos na walang ilalaan na budget sa taong 2026 para sa flood control projects na pinangungunahan ng Department Public Works and Highways o DPWH dahil nasa ilalim pa rin ng imbestigasyon ang nasabing proyekto. Ang tanong ng karamihan, kailan kaya mabibigyan ng totoong solusyon ang problema ng bansa sa baha? Dahil ngayon, imbes na solusyon ang ating matamasa ay mas lalo tayong binabaha ng nakapanlulumo na kataksilan at kawatan. Kung ang akala nila ay kayang maibaon sa limot ang mga kasalukuyang nangyayari tulad ng mga nagdaan na isyung tuluyan nang naglaho, sila ay talo sa kanilang hinala. Hindi na muli sila hahayaan ng mga mamamayan na magpakabusog sa paglamon ng bilyones na pondo, nararapat lamang na pigilan dahil ang mga lumulutang ngayon ay labis pa sa labis. Kanya-kanyang pabango ang mga taong bumaho ang pangalan, ngunit kahit anong pilit niyo na gawing amoy bulaklak muli ang inyong mga ngalan, suntok na ito sa buwan. Nasa tao na ngayon ang kapangyarihan, natututo na tayong ipaglaban ang ating tinig dahil lahat ng labis ay kahit kailanman ay hindi nakabubuti. Habang maaga pa, hinding-hindi na muli hahayaan na maulit muli ang nakapanlulumo at mapait na pangyayaring ito dahil nasa kanila man ang kapangyarihan ng posisyon, nasa mga mamamayan pa rin ang tinig, boses, at laban.