LISTEN TO ARTICLESynthesized Narration • 0:00 / 0:00

Sa isang bansang takot ang mga namumuno sa edukadong tao, walang ibang kaawa-awa kundi ang mga kabataang tanging hangad lamang ay suporta para sa edukasyon. Para silang mga pinagkaitan ng simpleng karapatan, ang makapag-aral sa isang maginhawa at hindi barong-barong na eskwelahan. Isang kalapastanganan na pati suporta na inilaan sa edukasyon, pinasok na rin ng mga uhaw at tila lahat na lamang ay balak kupitan. Ayon kay DPWH Secretary Vince Dizon, 22 pa lamang ang nagagawa sa mahigit 1,700 na mga classrooms na dapat ay itatayo ngayong taon. 882 daw umano ang kasalukuyang ginagawa at 882 din di umano ang hindi pa nasisimulan. Kung titignan mo ang mga numero, halos ‘di maipaliwanag kung paano umabot sa ganito kalala ang korapsyon sa bansa. Matatandaan na noong setyembre, nabanggit ni Education Secretary Sonny Angara,na mahigit 1,000 silid-aralan ang hindi napapakinabangan na idineklarang tapos na ng DPWH. Pumapatak din sa 2 milyon hanggang 3 milyon ang halaga ng bawat silid-aralan. Mga simpleng paaralan na nga lamang ang tanging hiling ng ilang guro na pinagtitiisan ang mga sira-sirang silid-aralan na tumutulo sa tuwing umuulan at mga mag-aaral lalo na ang mga nasa bundok na naglalakad ng ilang kilometro at tumatawid ng ilog para makapasok, pinagkaitan pa. Talagang nakakadurog ng puso at nakakagalit, kahit sinong makaksaksi ng sitwasyon na ito ng ating bansa ay walang ibang maiisip kundi awa at pagkamuhi sa mga taong nasa likod ng kabalbalan sa ating edukasyon. Walang pinalampas, pati mga nakalaan sa mga bata ay pinagsamantalahan pa. Bukod pa riyan ang sunod-sunod na mga bagyo at lindol noong nakaraang buwan kung saan sila na ang mismong nagbunyag sa mga silid-aralan na ginamitan lamang ng substandard na materyales. Dahil kaunting bagyo at lindol lamang, wala na kaagad mabalikan na eskwelahan ang mga guro at mag-aaral. Kakulangan sa sahod ng mga guro, mga kagamitan sa loob ng paaralan, ang isa pa sa mga malaking problemang kinakaharap ng edukasyon sa bansa. Kung babalikan, ang P612.5 milyong confidential funds ng dating Deped Secretary Sara Duterte, ay nakatulong na sana upang punan ang kakulangan sa ahensya at hindi kung saan-saan na lamang napunta. Sa kabilang banda, nabanggit ni Sonny Angara na nararapat magkaroon ng bukod na imbestigasyon sa DPWH tungkol sa libo-libong ghost classrooms. Matatandaan na sumailalim na rin sa sandamakmak na imbestigasyon ang ahensya dahil sa ghost flood control projects na naging pugad na rin ng korapsyon sa bansa. Halos may pagkakaparehas dahil karaniwang ginagamit din sa mga flood controls ay substandard materials at halos mga hindi rin nasimulan o natapos man lang ang karamihan. Makikita ng karamihan na mayroon ng pattern ang korapsyon, kahit sa ganito kaliit na mga bagay, nakakabulsa pa rin talaga ang mga gahaman. Kung may isang ahensya ang nararapat na isailalim pa sa mas malalim at mas masinsinan pang imbestigasyon, ito ay ang Department of Public Works and Highways o DPWH. Hindi rin sapat ang imbestigasyon lamang, kailangan ng mayroong managot. Dahil mula flood control projects pa lamang at ngayon, ghost classroom projects naman ang lumilitaw at nagbubunyag sa labis pa sa labis na korapsyong nagaganap sa ating bansa. Hindi maaaring magpatuloy ang ganitong pangyayari dahil tuluyang malalagas ang pangarap ng bawat kabataang nangangarap na ituwid at linisin ang kasalukuyang bansa na napapaligiran na ng lumot at bumabaluktot sa sarili nitong landas.