Bakit mas maingay ang lipunan kapag babae ang nagtaas ng boses sa pamahalaan kaysa kapag milyong-milyong piso na ang tahimik na nawawala sa kaban ng bayan?

Naging malinaw ito nang busisiin ni Rep. Bel Zamora ang ₱7.22 milyong halaga ng mga baril na hindi diumano itinala bilang ari-arian sa SALN. Ngunit, sa halip na hingan ng pananagutan ang tanggapan sa pampublikong gastusin, pinukol ng marami ang kanilang galit sa kanyang kaanyuan, boses, at paraan ng pananalita.

Bakit sa sandaling magsalita ang kababaihan, tila samu’t saring pambabastos agad ang natatanggap nila? Habang kapag kalalakihan ang inakusahan ng pambabastos at umasta nang walang dekorum sa harap ng Senado, ipangangatwiran pa ito ng kanilang mga tagasuporta bilang bahagi ng kanilang karisma, pagiging makamasa, at pagpapakatotoo.

Tila mas galit pa ang lipunang ito sa kababaihang nagpapahayag ng sarili kaysa sa mismong mga krimen, pagnanakaw, at kapabayaan ng mga nasa pwesto.

Hindi lamang si Zamora ang biktima nito.

Tingnan natin si Leila de Lima. Noong talamak ang drug war ng dating pangulong si Rodrigo Duterte, ginamit ang pambabastos sa kanyang pagkababae para lamang ilihis ang tao mula sa usapin ng pamamaslang. Kay Risa Hontiveros, tuwing titindig siya laban sa pang-aabuso sa kapangyarihan, agad siyang binabagsakan ng mga lait patungkol sa kanyang kasarian. Maging si Leni Robredo, nang tumakbo sa pagka-pangulo noong 2022, ay minaliit at kinalatan ng mga kasinungalingan; pinagtatawanan ang kanyang boses para lamang ipintang mahina, kahit malinis at napatunayan ang kanyang nakaraang gawa.

Sa halip na busisiin ang pitong milyong piso na halaga ng baril na itinatanong sa pagdinig, mas pinili ng mga kritiko na lagyan ng malisya ang kaniyang paraan ng pagsasalita at bastusin ang kaniyang pagiging babae.

Ang paboritong panakip butas ng mga duwag sa argumento ay ang pambabastos sa kasarian ng nagsasalita.

Ang nakalulungkot pa rito, maging ang kapwa kababaihan ay nakikisali sa ganitong pagsira at pagpuna. Ginagamit ng patriyarkal na sistemang ito ang kapwa natin kababaihan para gumanap bilang pulis ng moralidad, imbes na maging kakampi sa pagtataguyod ng pantay na paggalang. Maling-mali na ipresenta ang sariling maruming interpretasyon bilang katotohanan para lamang sirain ang dignidad ng iba.

Sa halip na sumali sa paninira, mas kailangan nating tumayo at ipaglaban ang karapatan ng bawat babae na marinig, makita ang kaniyang katatagan, at respetuhin ang kaniyang katalinuhan nang walang halong panlalait sa kaniyang kaanyuan.

Panahon na para itigil ang pakikipagkuntsaba sa ganitong bulok na kaisipan. Ibalik natin ang galit kung saan ito nararapat. Hindi sa tono ng nagtatanong, kundi sa kawalan ng sagot ng nagnanakaw.

Sapagkat ang tunay na banta sa demokrasya ay hindi ang babaeng may lakas ng loob magsalita, kundi ang lipunang pilit siyang pinatatahimik.

The Frontman