LISTEN TO ARTICLESynthesized Narration • 0:00 / 0:00

Sa loob ng silid ay walang nakabukas na ilaw, Mga estudyante na sa iba’t ibang kasinungalingan ay nasisilaw. Hinahanap ang pag-asa na magdadala sa tamang daan. Kinabukasan ay hindi lamang mabibili kung saan-saan. Mga tao na nabubuhay sa kape, Katapangan sa pagmulat ay parang kape. Ang unang pag-asa ng bayan. Hinuhubog ang mga mamamayan. Hindi lamang guro, Hindi lamang nagtuturo. Mga aralin na hindi lamang nasa libro, Bawat layunin sa bawat araw ay klaro. Mga arkitekto ng edukasyon, Hindi dapat isang buwan lang ang admirasyon. Sa dami ng mga winawastong papel, Hindi nababawasan ang laki ng kanilang papel. Sa lipunan ay tila sila ay isa sa mga nagdadala, Binababa lahat ng mga tala. Upang maabot ng kanilang mga mag-aaral. Sa bawat salita ay may mas malalim na aral. Isang buwan na puno ng tsokolate at rosas, Ilang taon na parang nakaposas. Sa sistema na pinapabuhat ang bukas. Unti-unting nahuhulog sa butas. Sweldo na hindi sapat, Gobyernong hindi tapat. Sa kanila nahuhulog ang bigat, Inaalagaan ang mga sugat. Mga silid-aralan na hindi kumpleto, Mga kagamitan na mas konti pa sa alpabeto. Badyet na tila naliligaw, Mga responsibilidad na sumisigaw. Buhat ang kinabukasan, Pinagtatanggol ang mga kinabukasan. Lahat ay kayang gawin, Kahit gaano pa karami ang mga gawain. Para sa mga estudyante nila ay kaya ang lahat, Basta magkaroon ng ilaw ang lahat. Basta may kinabukasan ang bawat isa, Hindi lamang umiiyak sa kanilang mga lamesa. Bayani na maraming mukha, Minsan may ngiti sa mukha. Minsan takot ang dala, Minsan naman ay gantimpala. Pero lahat para sa kanilang mga “anak”. Pati ang mga bagsak. Lahat ay patas sa kanilang mga mata, Binibigay ang mga oportunidad sa lahat ng mga bata. Isang buwan na puno ng mga kanta, Mga sulat na kay haba ang mga talata. Higit pa sa lahat na iyan ang nararapat, Na ibigay sa mga guro na kaya ialay ang lahat. Sa bawat pagpasok sa silid ay tila may ilaw, Hindi na ito nakakasilaw. Dala ang mga pahina ng pag-asa. Higit pa sa iyong mababasa. Mabuhay ang mga guro, Mabuhay ang mga hindi napapagod magturo. Pagmamahal ay tunay at puro, Hindi mahahanap sa kahit anong libro.