Ang pag-ibig ko sa’yo ay parang sikat ng araw—ngunit takot ka sa liwanag.

Nakasuot ka ng salamin at dyaket, nagmamadali sa pinakamalapit na silungan upang magkubli sa dilim. Kahit alam mong sa bawat pagsikat ng umaga, hahabulin ka pa rin ng sinag. Tila isang pahiwatig na hindi mo kayang sumugal upang lasapin ang init na dala ng araw—ang pag-ibig na handa kong ialay.

Kung sakali mang takot ka sapagkat minsan ka nang napaso, at minsan ay naging pasakit ang sikat ng araw kaya mo ito nakitang banta sa halip na pag-asa. Nais kong maunawaan mo—ang pag-ibig ay hindi laging nakapapaso. May mga sinag na marahang humahaplos. May mga init na hindi nanununog, kundi nagpapagaling.

Hanggang kailan ka magtatago sa dilim? Hanggang kailan mo ipagkakait ang iyong sarili sa liwanag?

Ilang beses ko nang sinabi sa iyo na subukan mong pagbigyan ang araw na dumikit sa iyong balat. Sa paglipas ng panahon, nasisilayan ko ang pagbabago—minsan hindi mo na suot ang dyaket na pananggalang mo sa sikat ng araw. At noong tinanong kita, nagtataka kung bakit, hindi ko inaakalang dahil iyon sa aking sinabi. Sana hindi mo na ito isuot, kahit wala ako sa tabi mo upang magsabi.

Pinagbibigyan mo ba akong ibigin ka, o sadyang sa wakas ay natututuhan mo nang mahalin ang araw?

Kung sakaling mapagod ang araw at dumating ang huling takipsilim, matutuhan mo muna sanang mahalin ito katulad nang sa kung paano ko ito mahalin. Ang araw ay hindi nananatili sa iisang tapat ng langit. May oras itong lumisan, hindi dahil sa ayaw nitong magbigay ng liwanag, kundi dahil may mga dapit-hapon ding kailangang yakapin.

At kung dumating ang oras na ako’y lumubog, sana’y huwag mo lamang ako mahalin kapag ako’y alaala na lamang ng liwanag. Hindi kita pipilitin kung sakaling ayaw mong iwanan ang lilim. Sapagkat ang pag-ibig, tulad ng araw, ay hindi dapat ipagsiksikan—ito’y kusang sumisikat.

Huling hiling ko lamang, kung sakaling hindi mo ako piliin sa liwanag, matagpuan mo ang araw na hindi mo na kailangang katakutan.

Mahal kita—tulad ng araw na patuloy na sumisikat, kahit hindi palaging pinipili.

The Frontman