LISTEN TO ARTICLESynthesized Narration • 0:00 / 0:00

Sa bawat ngiti, tawa, at sandaling magkasama tayo — hindi ko inakala na kasabay pala nito ang mga salitang iyong binitiwan. Habang lumilipas ang mga taon, ikaw pa rin ang laman ng aking isipan. Bawat segundo, minuto, at oras, maging sa pagmulat ng aking mga mata, hindi ko mapigilan ang maalala ang ating mga pangako noong tayo’y humiling sa bulalakaw — “Palagi mong tandaan, hindi kita iiwan.” Ngayon, hindi na ako ang panalangin mo. Hindi na ako ang bumubuo ng araw mo — Ngunit ikaw pa rin ang dahilan ng bawat araw ko. Nananatili akong narito, tahimik na naghihintay. Tanda ko pa ang mga gabing ako ang tinatawagan mo — kahit abala tayo sa kani-kaniyang mundo. At sa tuwing may nagsasabi ng masama tungkol sa’yo, ako pa rin ang unang nagtatanggol, kahit alam kong hindi mo na ako pinipili. Bitbit ko pa rin ang mga litrato natin — mga alaala na parang nakaukit na sa puso. Hindi ko man mabitawan, paulit-ulit ko pa ring sinasabi sa sarili: “Nandito lang ako.” Naghihintay sa pagbabalik mo, dahil ikaw ang nawawalang piraso ng puso kong sugatan. Tuwing gabi, bumabalik ang tamis ng iyong mga ngiti — at kahit gusto kong kalimutan, hindi ko maiwasang maalala ang lahat. Minsan nalilimutan ko na ang boses mo, ang mukha mo, pati na rin ang iyong pagkatao — pero hindi ang pag-ibig na iniwan mo. Sa dilim ng gabi, hinahanap ko pa rin ang init ng iyong yakap, ang tamis ng iyong labi. Ngunit tila lahat ng alaala natin ay iyong nilimot — niyurakan, tinapakan, parang walang halaga. Ang mga piraso ng ating kahapon, ako na lang ang patuloy na kumakapit. Sa lugar kung saan mo ako iniwan, naroon pa rin ako — nakatayo, naghihintay. Pagod na ang katawan, nanginginig na ang mga binti, ngunit patuloy pa rin sa pag-asa. Luha sa mata, alak sa tiyan, at puso sa sakit — lahat iyon, para lang patuloy kitang maalala. Sa aking mga panaginip, sinusulit ko ang mga yakap mo. Doon na lang kita muling nakikita — habang ako’y naghihintay, umiiyak, at patuloy na nababaliw sa alaala mo. At tandaan mo, “Nandito pa rin ako, naghihintay sa’yo.”