Ang edukasyon ay isang karapatang dapat natatamasa ng bawat Pilipino sa bansa. Ang edukasyon ay hindi lamang isang pribilehiyo kung saan limitado sa mga mayayaman o may kayang pamilya. Edukasyon ang susi para sa kinabukasan nating mga kabataan upang tayo ay magkaroon ng kaalaman sa mga nangyayari sa ating paligid, ngunit tila ang iilang estudyanteng nagnanais makapag-aral sa state university upang matupad ang kanilang pangarap ay inaagawan ng mga estudyanteng may pribilehiyong magbayad ng kanilang matrikula sa mga pribadong unibersidad.

Nito lamang Abril 2026, naglabas ang University of the Philippines (UP) ng resulta ng UP College Admission Test (UPCAT) para sa mga UPCAT takers nitong taong panuruan 2025-2026—12.45% o 18,350 na estudyante ang pinalad na makapasok sa unibersidad. 57.1% dito ay galing sa pampubliko at science high school, at 42.5% naman ay galing sa pribadong paaralan. Nakakapanghinayang isipin na karamihan sa mga estudyanteng galing sa pribadong eskwelahan ay kayang pag-aralin ng kanilang mga magulang sa mga pribadong unibersidad. Tila isinisiksik na lamang nila ang kanilang sarili para lamang matawag na isko at iska ng kanilang mga kapamilya at kaibigan.

Marami sa mga nakakapasa sa UP ay galing sa mga pribadong paaralan o science high schools na may mas magandang pasilidad. Hindi ibig sabihin na hindi karapat-dapat ang mga galing sa mahihirap na pampublikong paaralan—kailangan lang nila ng pantay na oportunidad mula pa sa batayang edukasyon.

Ayon sa pahayag ng UP President na si Angelo Jimenez noong 2025, isa sa misyon nila ay siguraduhing ang bawat karapat-dapat na Pilipino—anuman ang katayuan sa lipunan, kabuhayan, o kalagayan sa buhay—ay magkaroon ng pagkakataong maranasan ang de-kalidad na edukasyon sa UP. Maganda ang kaniyang isinaad na pahayag, ngunit sa kasalukuyang sistema na mayroon ang UP, hindi malayong marami na namang mayayamang estudyante ang makapasok sa unibersidad dahil lamang matalino at magagaling sila.

Ang edukasyon ay nararapat para sa lahat, ngunit ang isang state university na ninanais ng karamihan dahil libre at walang babayaran, ay tila inaagaw ng mga mayayamang estudyante o pamilya. Ang state university ay para sa lahat, oo, ngunit hindi ito nangangahulugan na pati ang mga estudyanteng galing sa mayayamang pamilya ay dapat ipagsiksikan ang kanilang sarili sa loob ng pamantasan.

Maraming estudyante mula sa payak na pamumuhay ang napipilitan na lamang pumasok sa mga pribadong eskwelahan, sapagkat karamihan sa mga nasa state university na kanilang pinapangarap ay inaagaw na ng mga mayayaman. Tila inaagawan ng mga may pribilehiyong tao ang pangarap na sana ay ninanais matupad ng mga ordinaryong Pilipino.

Ang UP ay ginawa para sa mga estudyanteng may mataas na pangarap at nais mag-aral ng walang binabayarang kahit na anong matrikula buwan-buwan, subalit kung patuloy na papapasukin ng UP ang mga Pilipinong galing sa yaman, hindi malayong mawalan ng pag-asa at kumpiyansa ang mga estudyanteng galing sa payak na pamumuhay tulad ko.

Mas paigihin sana ng UP ang pagpapapasok ng mga estudyante, sapagkat ang UP ay itinayo para sa mga taong kapos-palad upang hindi na nila intindihin ang babayaran nila buwan-buwan. Hindi lamang dapat talino at pagiging magaling sa akademiko ang sukatan upang makapasok sa pamantasan, gayundin dapat sa estado ng kanilang buhay. Bilang isang isko na nag-aaral sa isang state university, nakakapanghinayang na ang mga kaklase ko ay pumapasok sakay ng mga mamahaling sasakyan ngunit ay nag-aaral sa pamantasang dapat natatamasa ng mga estudyanteng kapos-palad.

Ang edukasyon ay para sa lahat, ngunit ang pampublikong unibersidad ay hindi para sa lahat—para ito sa mga estudyanteng walang pambayad ng matrikula sa pribadong eskwelahan. Ang UP ay ginawa hindi upang gawing isang tambakan ng mga mayayamang tao, ito ay ginawa para sa mga estudyanteng walang kakayahang maglabas ng malaking pera.

Hindi kailanman naging simpleng laro ng paligsahan ang edukasyon; ito ay isang balwarte ng pag-asa para sa mga Pilipinong pinagkaitan ng oportunidad dahil sa kahirapan. Kung patuloy na magiging bulag ang sistema sa malalim na agwat ng estado sa lipunan, ang mga pampublikong pamantasan tulad ng UP ay unti-unti na lamang magiging eksklusibo para sa mga mayayaman.

The Frontman